Предыдущая публикация
Deraza pardasi yelkanday shishdi,
Yana seni o'ylab ko'nglim uvishdi,
Seni olib ketdi qaysi daryolar,
Hamrohing bo'ldilar qanday sabolar?
Xonamga nastarin bo'yi bo'yladi,
Sochlari rayhonim, seni o'yladim,
Bo'ying to'kildimi olis bog'larga,
Ko'ngling ko'nikdimi qarg'a, zog'larga?
Kaptarlar bir-birin suyib o'pishdi,
Xayolim sen tomon qush bo'lib uchdi,
Sen nechun ketding, men nechun ketkazdim,
Qanotimga o'zim shikast yetkazdim.
Deraza rahiga boshimni qo'yib,
O'yladim, yomg'irsiz o'tdimi to'ying,
Yig'lamadim, faqat xo'rsindim xolos,
Boladek jimgina o'ksindim xolos...
Следующая публикация
Нет комментариев