Минем дусларым

Гульсиня Шакирова Сания . Хикәя .Дәвамы . Сания өйгә кереп самавыр куеп җибәрде .Иртәнге чәйгә булыр диеп коймак туглап куйды .Аннары мичкә юка агачлар гына алып кереп ягып та җибәрде .Мич өлгергәнче диеп бәрәңге әрчеп ,табага уртага ярып пешерергә хөбби бәрәңгесенә әзерләп куйды .Мичтә матур булып чарт - чорт килеп утын яна . Коры - сары гына булгач җылысы да тиз чыга ,тиз өлгерә дә күмере .Сания мич алдына күмер тартып коймак пешерә башлады .Коймакның тәмле исе бөтен өйгә таралды . Кайнанасы да инде башкача аунап ятарга теләмичә урыныннан торды .Урын - җирен җыеп куйганнан соң чыгып юынып керергә чыгып барганда Сания аңа ,хәзер әнкәй казан астына күмер тыккан идем ,комганыңа җылы су бирәм диеп туктатып калды .Әйе инде монда бит шәһәр фатиры түгел ,бер краннан кайнар ,бер краннан салкын су агып тормый диеп уйлап куйды әнисе .Үзе барыбер шат иде ул ,үз өендә булуына куанып .Сания, әз генә көтеп тор әнкәй ,хәзер коймакларны гына пешереп бетерим дә ,аннары сиңа булышырмын диде ягымлы гына итеп .Шулай бит инде ул, олы кешенең әздән күңеле була ,әздән хәтере кала диеп тәккә генә әйтмәгәннәр .Әнисе дә ярар кызым ярар ,барыр җирем Бохара түгел бит ,өлгерермен диде Саниянең уңганлыгына тагын бер кабат сокланып .Сания коймакларын пешереп бетергәннән соң мичтәге калган күмерләрне кечеучакка тартты да табадагы бәрәңгене мичкә тыгып капкачын ябып куйды . Менә әнкәй булды да .Хәзер синең белән иртәнге урамнарны карап ,шунда иркенләп юынып та керерсең диеп ,комганга казаннан чүмеч белән җылы су тутырды да, әнисе белән ишек алдына чыктылар .Инде кояш шактый гына югары күтәрелергә өлгергән иде ,үләндәге чыклар да кибеп беткән ,ишек алды яшел келәм җәйгәндәй матур иде .Алар әнисе белән эшләрен бетереп кергәндә Хәлим дә йокысыннан уянып чыкты .Ай - яй ,шундый рәхәт йоклаганмын ,хаттә сезнең йөргәнне дә тоймадым диде ул чыга - чыгышка . Сания иренә назлы карашын ташлап ,башындагы ак яулыгын ипләп куйды .Арыган да идек бит инде, кичә күп эшләнде диде .Аңа бу аклы чәчәкле яулык ,яшел чирәм келәмдә басып торганда бигрәк тә килешеп ,йөзен ачып тора иде .Хәлим дә юынып алгач ,бергәләп чәй эчәргә утырдылар .Алар ишек алдында йөргән арада ,мичтә бәрәңге дә пешеп өлгергән иде инде .Баз бәрәңгесе болай да тәмле була бит инде ул ,мичтә дә пешкәч тагын да ,асты - өсте килеп кызарып пешкән иде . Ай - яй тәмле диешеп ,мактый мактый ашадылар ,аннан коймак белән чәйләп алганнан соң ,калган эшләрне барларга керештеләр . Хәлим баздан бәрәңге чыгарды да чоланга әнисе ала алырлык кына урынга куйды . Сания ипи изеп куйды да ,ипи калайларын юып алып керим диеп ишек алдына чыкты .Аларның коелары үзләренеке иде .Хәлим берничә чиләк су да кертеп салды өйдәге су савытына . Чиләкләргә дә кертеп куярга кирәк диде Сания .Ул ипи калайларын юып кергәндә камыр елгергән иде ,ул он кушып камырны басып куйды да мичкә ягырга утын алып кереп бир әле диеп иренә дәште .Хәлим дә юк - бар эшләрен караштырып ихатада йөри иде ,ә дигәнче кертеп тә куйды .Мичкә дә җайлап кына тутырып ягып кына җибәрергә әзерләп калдырды .Җылы өйдә камыр тиз өлгерде .Менә мичкә тыгып аласы гына калды .Ипи калайларыннан камыр менә чыгам ,менә чыгам дигәндә мич тә өлгерде ,ипи калайлары да мичкә кереп киттеләр .Сания сәгатенә карады ,нәкь бер сәгатьтән ипи пешеп чыгарга тиеш алла боерса ,хәерле ризык булырга язсын амин диеп ,изге теләкләрендә булды Сания ,ипине мичкә тыкканда . Булат кич клубтан соңрак кайтканлыктан ,йокысыннан торасы килмиенчә генә торды ,әле күпме аунар иде икән тагын ,әгәр әбисе килеп дәшмәгән булса .Тор инде балам тор ,бар юынып кер ,ашап та алырсың ,әниеңнәрнең эшләре вакытлы бетсә бәлкем китеп тә барырсыз диде .Тәки шулай булды да .Сания мичтән ипиләрне чыгарганда әле ун да тулмаган иде .Әзерләнәсе әйбер әзерләнгән ,ашарга пешкән ,сулары өйгә кертеп куелган ,бәрәңге белән суган чоланда ящикка тутырып куелган ,әнисенә бар да уңайлы гына алырга . Суыткычта да барысы да үз урынында .Ит тарткычтан чыгарылган ит билгеле генә итеп алырга җайлап тезелгән. Сания барысын да тагын бер кабат күздән кичергәннән соң, күршеләренә кереп чыкты . Әниләренә күз колак булуларын үтенде ,алар күршеләре белән барысы да тату торучылар ,бер урамда бит ,ярар борчылмагыз диеп калдылар . Сания өйгә чыккач Хәлимгә , әллә юлга кузгалыйкмы бүген, иртәгәне көтеп ятканчы ,әле вакыт иртә бит ,өйлә дә җитмәгән диде .Хәлим дә , әнисе дә берни әйтмәделәр . Әнисе ,балалар Саниянең дә сүзләре дөрес ,юлчының юлда булуы хәерле ,барыгыз булмаса кузгалып карагыз ,исән - сау йөреп кайтыгыз диеп озатып калды .Санияләр әниләренә кайтып ,әйберләрен барлаган арада Булат та ашап - эчеп алган иде инде ,алар әниләре белән саубуллашып ,китәргә олы юлга чыгып киттеләр . Юлда машиналар күп түгел ,ара - тирә генә үтеп торган йөк машиналарын искә алмаганда юл буш һәм тыныч иде .Алар юл буендагы чирәмгә чемоданнарын куеп автобус килгәнен көтә башладылар .Шактый көтәргә туры килде әле аларга ,зато юлдан үтүче Пазик ,борынлы автобус, Казанга кадәр бара торган булып чыкты .Менә бит ул ,бисмилла әйтеп кузгалган юл ,әниләре бисмиллаларын укып ,хәерле юллар теләп калдылар .Казанга да бик җайлы килеп җиттеләр .Төшеп калган тукталышларыннан аэропортка автобус та үтә икән.Монда көтәргә дә туры килмәде ,алар килеп басуга автобус та килеп туктады . Кеше күп булса да ,басып барырга урын бар иде әле . Сания баскан җирдәге урында бер яшь егет утырып бара иде ,ул торып Саниягә урынын тәкьдим итте Ходай рәхмәте . Менә аэропортка да килеп җиттеләр .Халык автобустан чыга барды ,билет алу өчен кассаларга йөгерделәр .Кем кая бара инде ,төрле кассада төрле җирләргә саталар . Санияләр дә Сочи диеп язылган өченче тәрәзәгә бардылар .Бу тәрәзәдә кеше дә ,чират та юк иде .Сания тәрәзәгә башын иеп Сочига билет сорады .Кассир ханым кайчанга икәнен сорагач иң беренче рейс кайчан буласын сорады .Ике сәгатьтән оча ,Сочига диде кассир ханым.Алайса безгә өч билет бирә алмассызмы диеп паспортлары белән акча сузды Сания .Менә билетлар да кулда.Алар билет алу белән регистрация теркәлүе башланды . Дәвамы бар. Гөлсинә Шакирова.

Гульсиня Шакирова Сания . Хикәя .Дәвамы . Менә инде регистрация тикшерүе дә тәмамланды ,чемоданнар багажга тапшырылды ,барча кешеләр дә ,кулларында җиңелчә кул сумкалары белән генә яшел зонага үтеп ,самолетка утырта башлауларын көтә башладылар .Сания бер буфет янына барып чәй сорады , бераз капкалап чәй дә эчеп алыр өчен Хәлим белән Булатны да чакырды .Алар юлда бәлкем капкалап алырбыз диеп ,өйдән коры - сары гына тыкканнар иде , менә хәзер чәй алып шулар белән тамак ялгап алдылар . Әле аларның Сочига баргач кайда ,нинди шифаханәдә ял итәчәкләре уйланылмаган иде .Менә хәзер өчесе бергә шуны да сөйләшеп алдылар .Инде беренче генә барулары булмаганлыктан ,алар диңгез ярындагы беренче линиягә урнашкан шифаханәләрне барлап чыктылар һәм иң беренче барган ,,Светлана "га тукталдылар .Бәлкем тагын шунда барырбыз диеп тәкьдим итте Булат .Сезнең анда ял иткәнегез булса да ,минем булганым юк бит әле диде . Хәлим белән Саниянең үзләренә дә бик якын иде шул бу ,,Светлана " шифаханәсе .Ул бит аларга Булатны бүләк итте. Менә кызык ...әллә Булатны да шул тартамы икән үзенә ял итәргә диеп уйлады Сания . Тик әлегә бу уйларын ни ,иренә ни улы Булатка әйтмәде .Әле ял итәсе күп бит ,сөйләрләр улларына кайда үзенең тормышы башланганын .Тәккә түгелдер инде ,уенда гел Сочига китеп ,берәр яхшы клиникада эшләсе килү теләге. Менә самолетка утырту да башланасын хәбәр иттеләр . Халык дәррәү кубып ,самолетка утырту өчен билетларны тикшерү ишегенә чиратка баса башлады . Ике кыз ике якка басып ,тиз - тиз паспорт белән билетларны тикшергәннән соң ,самолетка утырта башладылар .Траптан күтәрелгәндә Сания артына борылып аэропорт ягына карап алды ,анда әле тагын бер автобуска халык утырырга көтеп тора иде .Менә алар самолет салонына кереп ,үзләренең урыннарына барып утырдылар .Урыннарын карап йөрүчеләргә комачау итмәс өчен ,әлегә сумкаларын да кулларында тотып торды Сания .Менә бар да кереп беттеләр ,инде Хәлим үренеп өстәге багажникка сумкасын куйды һәм җайлап утырып куркынычсызлык каешын эләктерде .Әкерен генә мотор эшләгән тавыш ишетелә башлады .Стюардесса кызлар ,ике урталыктан йөреп куркынычсызлык каешларын тикшереп чыктылар һәм ике урталыкка басып ,очканда үтәлергә тиешле тәләпләрне аңлаттылар .Шуннан соң инде самолетның очарга әзер булуын хәбәр иттеләр .Менә самолет әкерен генә урыныннан кузгалып ,бераз чабып барды да җирдән аерылды .Хәерле юллар барыгызга да диеп стюардессалар салонда хәерле юл теләделәр . Сания инде ике көн авылда бар көчен биреп эшләп ,аннан юлда арыган иде .Самолетның җиңелчә генә тирбәткәләп алуына ,тигез генә гөрелдәгән мотор тавышына изерәп йоклап та китте.Аңа карап Хәлимнең дә күзләренә йокы төште .Төн үзенекен итте, салонда күп кенә кеше йокылы - уяулы бара иде инде .Тик Булатның гына күзенә йокы төшмәде .Ул иллюминатордан төнге күктән астагы җирне карап барды . Әле аның төнлә очканы юк иде ,җирдә янган утлар астан кечкенә генә булып күренәләр. Өч - дүрт кенә утлылары авыллардыр инде диеп фикер йөртте ул ,ә шәһәрләр күп утлары белән аерылып торалар иде . Менә инде килеп тә җитәбез диеп салонның утларын кабыздылар.Ул утларны кешеләр йоклый башлагач ,кечкенәләрен генә калдырып сүндергәннәр иде . Кешеләр дә йокыларыннан уянып ,кайсы туалетка ,кайсы юынырга баргалап килделәр .Стюардессалар кабаттан куркынычсызлык каешларын эләктерергә кушып тикшереп чыктылар һәм самолетның төшеп җиргә утырырга әзер булуын җиткерделәр .Менә самолет ипләп кенә аска төшә башлады башта ап - ак сөт шикелле болытлар арасына килеп керде ,аннары сыек томан арасыннан бераз барганнан соң ачык күк йөзе күренде .Аста җәерәп Кара диңгез киңлекләре ята .Инде кара кучкыл булып суына кадәр аерылып күренде .Менә самолет җайлап кына диңгез ярына терәлеп үк тора диярлек Адлер аэропортына төшеп утырып ,асфальт полосадан чаба башлады .Халык дәррәү кул чабарга ,үзләрен исән - сау алып килеп җиткергән пилотларга рәхмәт әйтергә тотынды . Самолеттан төшеп ,чемодан - нарын алганда инде иртәнге кояш чыккан иде .Алар автобус тукталышына китеп, беренче автобус белән үк ,,Светлана " шифаханәсенә киттеләр .Белгән юллары , сорашып торасы юк ,алар барып кергәндә рессепшенда бер хезмәткәр нәрсәдер язып утыра иде ,алар кергәч башын күтәреп карады да ,урыныннан торып ,исәнләшеп аларны урнаштыру хәстәренә кереште. Сания як - ягына каранып нинди үзгәрешләр барлыгын караштырды .Чисталык һәм пөхтәлек беренче күзгә ташланганы шул инде Саниянең кайда гына булса да. Кәгазьләрне тутырып ,кайсы бүлмәгә урнашасын әйтеп ,ачкычны алып ул аларга бүлмәләрен күрсәтергә алып китте .Барлык урын - җир кирәк - яраклары һәм полотенцалар да ап - аклар ,урыннар ялт итеп җыеп куелган өч кешелек бишенче каттагы бүлмә иде бу . Барын да күрсәтеп аңлатканнан соң ,суыткычта эчә торган суны көн саен куйганнарын һәм чәй куеп эчәр өчен өстәлдәге графинага суны көн дә алыштырылуын әйтеп чыгып китте .Дөрестән дә кырыйда торган комод өстендә подноста тулы сулы графина һәм өч стакан тора . Суыткычта да өсте каплана торган капрон стаканнарда өч стакан салкын су ,берничә шикәр ,кофе һәм пакетлы кара чәй салынган тартма тора иде. Душта өч кешегә исәпләнгән өч сабын ,өч шампунь тора . Юлдан килгәч өчесе дә душка кереп чыктылар ,чәй куеп эчеп алдылар һәм иртәнге ашарга барганчы диңгезне карап килик диеп диңгез буена чыгып киттеләр . Дәвамы бар . Гөлсинә Шакирова.

Гульсиня Шакирова Сания . Хикәя .Дәвамы . Иртәнге диңгезнең матурлыгын сөйләп кенә аңлатырлык түгел аны .Берсен берсе куышып килгән дулкыннарны ,болында ялларын җилдә җилфердәтеп уйнаклап чабучы тайлар белән чагыштырып булыр иде .Алар күбекләнеп киләләр - киләләр дә ,шап - шоп итеп ярга килеп бәрелеп таралышып кабат кирегә китәләр .Нинди матур ,могҗизалар тудыра ала бит табигаттәге без белмәгән сихри көчләр .Шуларга сокланып хәйран гына карап торды әле Сания .Хәлим ком арасыннан матуррак ташлар ,әкәм - төкәм кабыклары караштырам әле диеп аякларын салып су буена ук төшеп китте ,ә Булат тирә - юньне күзәтеп киләм диеп яр буйлап китеп барды .Ул инде бала - чага түгел ,аның артыннан йөрисе юк ,шулай да әнисе иртәнге ашка соңга калмаска кушты .Аннан бит әле аларның шифаханәнең терапевтына да күренәселәре бар .Килгән җирдән берәр дәвалау курсы да алырлар бәлкем.Бер дә булмаса ,массаж белән күкертле су ваннасы ,,Маццеста " га йөреп алырлар .Аның бөтен авыруга да файдасы күп . Алар шулай һәрберсе үз мәшәкатьләре белән йөреп вакытның үткәнен сизми дә калдылар ,ерак түгел генә урнашкан кафега ял итүчеләр килә башлагач алар да ашарга керделәр .Инде өстәлләргә ашау кирәк - яраклары приборлар куелган ,һәр өстәл уртасында матур чәчәкле фарфор ак чуеннарда дөге боткасы салынган һәм шунда ук салып алу өчен кечерәк кенә ялтырап торган чүмече дә бар .Тәлинкәләр ,калаклар да ап - ак салфеткага төреп дүрт тәлинкә кырында тора . Бу һәр өстәлдә дә шулай .Ял итүчеләргә барлык уңайлыклар да тудырылган .Бу матурлыкка сокланмый мөмкин түгел .Ашап алгач алар бүлмәләренә кайтып өс - башларын алмаштырып , җиңелчә генә киенеп шифаханә табибының бүлмәсенә килделәр .Ул аларга санатория картасын тутырып бирде .Өчесенә дә массаҗ һәм күкертле ванна билгеләде .Монда һәр көнне барасы сәгатьләре язылган , вакытында гына барып дәвалану курсын үтәсең .Бик тә уңайлы ,ялыктырмый да . Бүген диңгездә генә ял итәрбез дә ,шәһәр карарга башка көнне чыгарбыз диде Сания. Ярар диеп аның белән килеште ире дә ,тик Булат кына ,әнием мин монда сезне саклап ята алмыйм бит инде ,мин үзем генә дә йөри алам ачуланма- сагыз мин шәһәргә чыгып керер идем диде ,ни әйтә алсын соң инде аңа Сания ,алдыңны - артыңны карап йөри күр диеп рөхсәт бирде .Хәлим улына карап үзенең дә яшь егет чакларын искә төшереп елмаеп куйды . Булат иртән ,яр буе белән барганда ,үзләренең шифаханәсеннән ерак та түгел урнашкан икенче ,,Жемчужина ' шифаханәсе ярында бер чибәр генә кызны очыратып сөйләшеп торган иде ,менә хәзер дә шул кызны эзләп табып танышу иде аның максаты .Шуңа ул әниләренә бар серне дә ачып бетермичә ,шәһәргә чыгуны сылтау итеп ,алар яныннан китү ягын карады .Әллә ни чибәр булмаса да, бу кыз аны үзенең тыйнаклыгы белән җәлеп итте .Булат белмәгән кыяфәт чыгарып аннан үзләренең шифаханәсенең кайдарак урнашкан булуын сорады ,ә Сәлимә ,кызның исеме шулай иде ,бер дә тартынып тормыйча ,сез бит инде аны үтеп киткәнсез .Ул Бамбук агачлары уртасында утыра ,бәлкем шәйләмиенчә үтеп киткәнсездер диеп Булат килгән якка күрсәтте . Булат инде дүрт ел Казанда укыганга ,үзен кызлар янында иркен тота белә иде .Анда итагәтьлелек тә җитәрлек .Шуңа аңа Сәлимә белән танышу да әллә ни авырлык тәләп итмәде .Кызга да ,әнисе белән генә күңелсез иде бугай ,ул Булат белән беренче сөйләшкәндә үк исемен дә әйтте ,танышуы - бызга шатмын диде .Тик каян икәнен генә Булат сорамады , ул әйтмәде .Булат менә хәзер кабат шул Сәлимә белән очырашкан җиргә китте .Ул аңа берни дә вәгьдә дә итмәде ,очырашу да билгелә - мәде ,тик әле яңа гына танышкан шул кыз янына күңеле белән тартылды .Әнисе белән Сәлимә киң ябалдашлы кипарис агачы ышыгындагы скәмиядә утыралар иде .Яр буенда да кызынып - коенып ял итүчеләр күп ,кояшны каплаучы гөмбәләр астында гына урыннар юк иде инде . Сәлимәнең бөрчекле ак сарафаны үзенә бик килешеп тора ,ул да Булатны күргәч елмаеп куйды ,тик үзе башлап сүз катмады .Булат алар янына килеп җиткәч дустанә елмаеп ,Саниягә диңгез яры буйлап йөреп килергә тәкьдим итте .Сания белән якыннанрак танышасы килүен ,үзенең кай яклардан икәнен әйтеп ,әнисеннән рөхсәт сорап, икесе җитәкләшеп китеп тә бардылар .Эх ,бу яшьлек ,кай ара үсет тә җитте соң әле бу кызым диеп ,үз хыялларында уйланып шактый утырды әле ул бу скәмиядә .Ярар танышсыннар ,сөйләшсеннәр ,беренче күрүендә үк ошатты бит кызы бу егетне .Инде институт бетереп тә ,бер егет белән дә очырашканы юк әле кызының .Әбисе гел әйтә килде үскәндә ,кызым акылың булсын ,акылың булса бәхетең булыр диеп .Егет тә бик тәртипле тыйнак күренә ,әти - әнисенең тәрбияле гаиләдән икәне сөйләменнән үк күренә диеп фикер йөртте ничә еллар инде мәктәптә тарих укытучысы булган Хәлимә . Кызын да, ничек кенә укытучыга укырга барырга үгетләп карасалар да ,аның табиб һөнәрен сайлауларына да каршы төшмәделәр инде .Сәлимә Өфе каласында табиблар әзерли торган уку йортына барып имтиханнарын биреп кайткач ,кызларының йөзендә балкыган нурны күреп ,кызлары белән бергә шатландылар .Менә быел укуын бетереп кызыл диплом алгач ,әтиләре аңа монда, Сочида ял итәргә юллама алып ,әнисе белән икесен ял итәргә озатып калды .Үзе , Сәлимәдән соң туган ике энесе малайлар белән ,йорт - җирне барлап торырга калды .Авыл җирендә терлек - туарсыз яшәп булмый ,терлекле өйне ялгыз да калдырып чыгып китеп булмый .Менә шулай икегә бүленделәр алар бу юлы .И бу уйлар ,кайларга гына илтми дә ,кайларда гына йөртми .Хәлимә кызын көтеп утырган арада диңгездә дә аякларын чылатып йөреп менде .Диңгездә үзе генә коенып йөзәсе килмәде ,шуңа кабат үзләре утырган Кипарис агачы ышыгындагы скәмиягә килеп утырды . Булат белән Сәлимә яр буйлап сөйләшә - сөйләшә җитәкләшеп барганда Булатның шаяртасы ,бу кызны су чәчерәтеп ирештерәсе килеп китте ,ул ике дә уйлап тормыйча аны тартып суга таба йөгерде .Менә алар яшь чактагы кыз белән малай кебек бер - берләренә су чәчрәтеп уйнап юешләнеп беттеләр .Көн бик матур ,кояш - ның эссе нурлары аларның юешләнгән киемнәрен бик тиз киптерде .Алар инде кайтыр якка борылганнар иде . Әниләренә ,көткәндә озак булып тоелган вакытны ,яшьләр сизмәделәр дә ,бик тиз үткән кебек булды ул аларга .Икесе дә бер төрле һөнәр сайлаулары ук ,Булатка бик нык тәэсир итте .Аралар ерак булса да бер - берсенә тартылу көче ,беренче күрүдә гашыйк булу шушымы соң әллә диеп уйлады ул .Сәлимә аннан бер генә яшькә олы .Минем әле бер ел укыйсым бар ,ә инде ул уку бетергән .Тукта ,тукта Булат ,ашыкма ,әти - әниеңнәр белән сөйләш ,киңәш .Аннары барысын да бергәләшеп хәл итәрбез диеп уйлады Булат. Сәлимәне әнисе янында калдырып ,саубуллашып яңадан очырашырга сүз куешып, үзләренең ял итә торган шифаханәгә кайтып китте . Дәвамы бар . Гөлсинә Шакирова.

Гульсиня Шакирова Сания . Хикәя . Дәвамы Хәлим белән Сания, озаккарак китте бит әле бу малайның кайтмавы диеп борчыла башлаганда гына , Булат алар янына килеп җитте. Аның шат елмаюлы йөзен күргәч ,әтисе сорамый булдыра алмады .Берәр оҗмах кошын күрдеңме әллә улым ,синең йөзеңә карасаң һичшиксез шулайдыр диеп уйларга мөмкин диде елмаеп. Ә күрдем дисәм ,ни дияр идегез диеп сорауга сорау белән җавап кайтарды улы әтисенә ,үзе кырын күзе белән генә әнисенә дә күз төшереп алды ,анысы нәрсә дияр икән тагын диеп ,тик Сания берни дә дәшмиенчә генә серле караш ташлады улына .Кирәк диеп санаса үзе әйтер әле ,бала - чага түгел диеп фикер йөртте әни кеше . Алар өйләгә ашарга ашханәгә таба менеп киттеләр ,инде шактый гына кеше ашап чыгарга өлгергән ,яңадан су буена төшеп киттеләр .Инде Санияләрнең өстәлләре билгеле булганлыктан ,алар туры шунда барып утырдылар. Алар килеп утыргач ,аш - су өләшеп йөрүче арбасын тартып ,офециант егет тә килеп җитте ,ул аларга ризыкларын калдырып ,ашларының тәмле булуын теләп китеп тә барды . Өйләдән соң алар өчесе бергә ,,Мацеста"га күкертле су ваннасы алырга киттеләр . Ул шифаханәдән ераккарак урнашкан ,автобус белән барышлы .Шуңа алар тизрәк йөреп кайтырга кирәк ,вакыты билгеле бит диеп автобус тукталышына ашыктылар. Аннан кайткач Булат әниләре белән су буена төшеп ,рәхәтлә - неп диңгездә коенды ,кояш нурларына кызынып комда ятты ,әниләренең дә улларына карап сөенечләре ,аңа булган ышанычлары артканнан - арта гына барды . Кич белән Булат ,кичке уенга чыгам диеп ,әниләренә әйтми генә кабат Сәлимә янына китте .Аның кыз турында барысын да беләсе килде .Бер күрүдә ошатты бит ул аны .Әниләрем дә ошатачак , һичшиксез ошатачак диеп уйлана - уйлана барып , Сәлимәләр шифаханәсе янына барып җиткәнен тоймый да калды .Сәлимә аңа үзләренең кайсы бүлмәдә урнашкан икәнен әйткән иде инде ,ул рессепшенда бүлмә номерын яздырып ,туры шунда кереп китте.Алар җитәкләшеп урамда пальмалар аллея - сында йөрделер ,фонтан янында утырып ял иттеләр . Аннан вакыт соң икән инде диеп Булат аны бүлмәсенә озатып куеп үзенә кайтып китте.Ул кайтканда әле әтисе дә әнисе дә йокламыйлар иде. Балконда төнге диңгез һавасы сулап ,сөйләшеп утыралар иде. Алар Булат кайкач ,кереп урыннарын җәя башладылар. Булат әтисе белән әнисенә, бүген Сәлимә исемле татар кызы белән танышуын әйтте. Кыз турында ни белә ,бер тында сөйләде дә бирде , ул сезгә дә ошаячак диде Булат әнисенә карап.Ярар ,әйдә җитәр бүгенгә улым ,ятыйк ял итик арытты юлдан соң диде Сәлимә үпкәләтмәслек кенә йомшак тавыш белән .Өчесе дә бисмиллаларын әйтеп урыннарына яттылар ,һәр берсе үз уйлары белән йоклап та киттеләр . Яңа урында төшеңдә кемне күрсәң ,тормыш иптәшең дә шул була дигән юрама бар бит әле ,тавык төшенә тары керә дигәне дә бар .Булатның да төшенә Сәлимә керде .Әллә өнемдә булдымы бу диеп уйланып ятты әле ул йокысыннан уянгач та . Алар шулай очырашкалап тордылар .Булат Сәлимәне әниләре белән дә таныштырды Сәлимәне әниләре дә бик ошаттылар .Булат аны Казанга эшкә чакырды .Әнисенең Казанда белгән кешеләре дә бар ,урнашырга булышырбыз диде аны тәмам ышандырып .Кызның да икеле микеле уйларга урын калдырмыйча . Яллары күңелле генә үтеп тә китте .Шәһәрдә йөрделәр , базарга барып ошаклы әйберләрен сатып алдылар. Яшьләр инде аерылмас, бер - берсенә чын - чынлап гашыйк булдылар .Сәлимәләрнең яллары берничә генә көнгә алдан бетеп ,алар кайтып киттеләр .Булат аларны автобус тукталышыннан озатып калды .Аңа, әллә ничек бик ямансу булып китте .Кал - ган көннәрен инде ул гел диңгез буенда үткәрде .Әни - ләре дә үзләренең ничек беренче кат монда ,нәкь тә менә шушы шифаханәдә ял итүләрен сөйләделәр .Моннан ялдан кайткач үзенең Булатка авырлы булуын белүен сөйләделәр.Менә улым шуңа күрә сине гел шушы Сочи каласы үзенә тартып торадыр диде көлеп әтисе. Менә аларның да яллары бетте ,иртәгә юлга кузгаласы. Кичтән әйберләрен барлап тутырып куйдылар ,ә иртәгә иртән суда йөзеп менәрләр дә юлга кузгалырлар алла боерса.Бик күңелле яллар булды диделәр өчесе дә ялдан кәнәгать калып . Казанга кайткач Булат кабат Сәлимә турында уйлана ,аны сагына башлады .Килерме икән ул монда диеп уйлап та куйды . Сәлимә дә күңелендә Булат белән кабат - кабат сөйләшә. Әллә чынлап та Казанга китәсеме икән ,каян гына очырады икән соң бу үҗәт егет минем юлларыма .Әллә дөрестән тә язганым шулмы икән дигән уйлар аның аңына тынгылык бирмиләр иде . Дәвамы бар. Гөлсинә Шакирова.

Гульсиня Шакирова Сания . Хикәя .Дәвамы . Ялдан кайткач Санияләр авылга әниләрен алып китәргә диеп кайттылар .Барысына да күп итеп күчтәнәч - бүләкләр дә алганнар иде.Барысы да сөенеп кабул итте ерактан кайткан бүләкләрне .Инә дә бүләк ,дөя дә бүләк дигән бит борынгылар . Алырга диеп кайтсалар да, әниләренең кире алар белән Буага ,шәһәр фатирына китәсе килмәде .Балалар ачуланма - гыз да , үгетләмәгез дә мин әле матур җәйләрне үз өемдә үткәрергә дигән карарга килдем .Үз өемнең бүрәнә арасындагы тузаны да дәва диләр бит әле .Мин дә шулай , монда кайткач сулыш алула - рыма кадәр башка .Сез бары - гыз ,минем өчен борчылмагыз күршеләрем белән дә ,кода - кодагыйлар белән дә бик тату яшибез аллага шөкер диеп бармаска үз планнарын нык - лап уйлап куйган иде .Ярар диеп килештеләр Хәлим белән Сания .Әлегә матур җәйдә торып кара инде алайса ,тик ни булса да хәбәрдә торырсың диеп китеп бардылар . Әтисе белән әнисе эшкә чыгып киткәч Булатның уйлары гел Сәлимә тирәсендә бөтерелде .Ул аннан адресын сорап калган иде .Әллә янына барып кайтырга микән дигән уйлар да килеп китте аның башына .Аннан кабат Сочида очырашуларын уйлап ул аны сагына ук башлады .Әле бит аның бер ел укыйсы , табиб дипломы яклыйсы һәм аласы бар ,ә аннан соң аның күптәнге хыялы ,Кара диңгез ярына урнашкан гүзәл Сочи каласын - дагы берәр шифаханәдә эшләү. Ул үзенә кабат - кабат бер үк сорауны бирә ...ничек болай бер күрүдә ошатты да гашыйк булды соң әле ул .Әтисе кебек бер күрдем дә ябыштым шушы буламы икән әллә соң ул .Әнә бит әтисе дә әнисен генә яраткан ,күпме көткән һәм әле дә Саниясе өчен җан атып яши диеп аларның сүрелмәс мәхаббәт тарихларын да искә алды .Шулай да әтисе кайткач аңа үзенең уйларын сөйләп , киңәш сорарга булды .Әнисе белән сөйләшсә ул каршы төшәсе көн кебек ачык икәнен Булат биш бармагы кебек белә иде инде . Әнисе белән әтисе эштән кайткач ,Булат икесе янында ук ,үзенең Сәлимәләр авылына барасы килүен әйтте .Ара якын түгел , Башкорт ягына чыгасы . Поезд белән .Казан - Өфе поездына утырсаң алып бара инде ул диеп уен - көлкегә алган әтисенә тутырып карады да ,ә син мондый очыракта ни эшләр идең диеп сорау бирде. Укулар башланганчы барып , мин аңа эшкә Казанга килергә чакырам .Әни синең бит танышларың күп ,булышыр - сың бит эшкә урнашырга диде әнисенә карап . Сания шушы сүзне генә көткән кебек ,бик теләп улым килсен монда Буага ,беләсең бит инде бездә яхшы табибларның җитешмәвен . Тулай торактан яшәп тору өчен урын да бирербез ,кайткан - киткәндә синең яныңда булыр алла боерса диде . Булат икенче көнне үк юлга чыгарга булды .Кулына Казанга укырга йөри торган сумкасына әнисе биргән күчтәнәчләрне салды да саубуллашып юлга кузгалды . Дөрестән дә, Сәлимәләрнең авылын табуы авыр булмады. Бернинди хәбәрсез килеп кергән Булатны күргәч әнисе әллә нишләп китте и балакаем каян - кая кадәр килеп җиткәнсең ,Сәлимәнең дә син диеп ,сине сагынып яшәгәнен белмисең шул син диде уфтанып .Булат сумкасыннан әнисе биреп җибәргән күчтәнәчләрне әстәлгә алып куйды да ,ә Сәлимә үзе кайда соң әле диеп сорады .Бу вакытта Сәлимә иптәш кызы белән җиләккә киткән иде . Тиздән кыйтырлар инде диде . Ә син бар әнә теге караватка ятып ял итеп ал , юлдан соң арыгансыңдыр диде. Булат карышып тормады , караватка барып башын мендәргә салды һәм күп тә үтмәде ,сабый баладай изерәп йоклап та китте . Сәлимәнең әнисе Хәлимә апасы чәй куеп өстәл әзерләп чәй эчәргә дәшим диеп барса , гамсез йоклап яткан егетне күргәч ,әкрен генә чыгып китте, юлдан арыгандыр инде балакаем диеп үзерчә җәлләп тә куйды әле. Менә җиләктән Сәлимә дә кайтты .Аңа әнисе сүзсез генә Булатны күрсәтте .Инде бу вакытта Булат та уянды һәм үзенең шулай йоклап китүен - нән уңайсызланып ,бер Хәлимә апасына ,бер Сәлимәгә карады.Аның бу карашын Сәлимә бик тиз тотып алды һәм Булатны юынып керергә диеп ишек алдына чакырды . Дәвамы бар . Гөлсинн Шакирова.

Гульсиня Шакирова Сания . Хикәя .Дәвамы . Булат үзе монда килгәндә бик кыю сыман чыгып киткән иде дә әниләре яныннан ,тик монда әллә ничек кенә кыюлыгы бетте дә китте .Әллә юлдан соң ятып торуына үкенү хисе тойдымы шунда ,кыюсыз бер малай кебек хис итте ул үзен .Сәлимә белән дә әллә ничек кенә ,салкын булды сыман сүз башлавы .Ярар диде ул күңеленнән ,ни булса шул инде хәзер ,килгәнсең икән дилбегәңне нык тот ,сүзеңне уйлап әйт ,бала чага уены уйнап утырма диде бит әтисе дә озатып җибәргән чагында . Менә алар ишек алдында икесе генә , Булатның шушы берничә минут эчендә булган кыюсызлыгы ,әтисе сүзләре исенә төшү белән ,каядыр юкка чыкты .Битләрен - кулларын юып алганнан соң ,үзенә сөртенергә бирергә тотып торган сөлгесе белән үк ул сөйгәнен кочаклап алды да ,көрәшергә җыенган мәйдан батыры кебек күтәреп битләреннән үбеп алды . Сәлимә үзе дә гел сагынып ,юксынып яшәде бит аны ,Сочида Кара диңгездән ялдан кайтып китеп шуннан алар аерылганнан бирле ,шуңа ул инде карышып та тормады. Булат аны җиргә бастырды да ,мин синсез яши алмыйм , мин сине алырга килдем диде. Алар шулай бер - берсенә карашып күпме торган булырлар иде икән ,Сәлимәнең әнисе болдыр баскычына чыгып ,аларны ашарга дәште . Өстәл артында да сүз сөреше тик алар турында булды .Менә алар ашап кубарга өлгермә - деләр урамнан Сәлимәнең ике энесе кайтып керделәр һәм үзләрендә чит кеше булуын күргәч итагәтьле генә күрешеп өстәл артына утырдылар . Тиздән әтиегез дә кайтып җитәр балакайларым ,карал- тыдагы эшләрне караштыр - дыгызмы соң әле диеп сорады әниләре малайлардан , ә малайлар әйе диеп баш как - тылар да ,көтү каршыларга урамга чыгып киттеләр .Алар чыгып киткәч ,Сәлимә өстәл - ләрне җыештырып ,савыт - сабаларны юып куйды да , түр өйгә, Булат янына кереп сөйләшергә утырды .Булат аңа үзенең уйларының төптән уйланган һәм әти - әнисе дә бу фикерен хуплаганын әйтте. Әле беркайда да эшли башламаган ,кулында кызыл дипломы булган кызга ,Казан - га яки Буага кайтып урнашу бернинди дә каршылык тудырырга тиеш түгел кебек тә үзе ,ә менә нинди җиргә эләгәсең бит ,нинди коллек- тивка .Ә монда сөйгәне үзенең янына чакыра бит .Әтисе кайт - кач барысын да уртага салып сөйләшерләр дә ,тәвәкәлләп чыгып китәргә һәм эшкә урнашып ,эшли башларга кирәк дип фикер йөртте Сәлимә ,үзе күберәк Булатны тыңлады .Каршы булмас әтисе дә үзенең яраткан кызына алла боерса. Уллары Башкорт ягына чыгып киткәч Саниягә әллә ничек ямансу булып китте ,ул Хәлиме янына килеп утырды да ...и әтисе ,кай ара үсеп җитте соң әле бу малай ,әле генә алып кайткан кебек идек бит диде. Менә быел соңгы елы ,аннан диплом якласы һәм үзе кебек тагын бер табиб, авыруларның саулыгы өчен көрәшә башлар алла боерса диеп ,иренең куенына ныграк сыенды. Эштән арып кайтуына да кара - мастан аларның яткач та күзләренә йокы кермәде . Шулай күпме сөйләшеп яткан - нардыр ,төн урталары узгач кына йокыга талдылар алар. Иртән уянганда йокламаган да кебек диде Сания ,ярый әле ял көннәре икесенең дә ,бераз бер - берсенә карашып иркә - ләнеп яттылар да ,болай ятып булмас эшләрне карарга кирәк диеп башта Сания торып китте. Ул торып ,юынып ,чәйләр куеп өстәл корыштырганнан соң гына ,иренә барып дәште . Хәлим дә шуны гына көткән кебек ,сөйгәнен кабат кочагына алды .Сания яшь җилкенчәк кебек ,нишләвең инде бу җаным диеп сөйгәне - нең кочагына ныграк сыенды . Алар бер - берләренең назыннан ,балавыз кояшта эрегән кебек эределәр . Өстәлдәге әзерләнгән җылы ризыклар да ,кайнар чәйләр дә суынып бетте . Дәвамы бар. Гөлсинә Шакирова.

Гульсиня Шакирова Сания . Хикәя .Дәвамы . Авыл авыл инде ул ,кала түгел .Менә көтүләр дә кайтты ,Сәлимәнең әтисе дә эштән кайтты ,әнисе белән бергәләп абзар - курада эшләрен бетереп ,әнисе сыер савып өйгә кергәндә ,инде Сәлимәнең ике энесе дә Булат абыйларын үз итеп ,аның янында бөтереләләр иде . Сәлимә әниләре керергә өстәл хәстәрләп ,токмач басып аш пешерде ,төйгән бәрәңге янына тәмле итеп гуляш та ясады.Менә барысы бергә өстәл артына утырыштылар . Башкортларда ипине хатын кызлар түгел ,ә ирләр күкрәкләренә терәп кисеп өстәлгә куялар икән дигәнне ишеткәне бар иде Булатның бу чынлап та шулай икәненә бүген үзе күреп инанды . Барысы да өстәл артына утырышып беткәч ,өй хуҗасы түгәрәк ипине күкрәгенә терәп шулкадәр горурлык белән кисте ,Булатның әле мондый күренешне беренче күрүе иде. Ул уртага куелган челтәрле тәлинкәгә ,бер - бер артлы тигез матур итеп киселгән ипи телемнәрен өя барды .Ул кирәк кадәрле ипине кисеп куйганнан соң гына ,барысы бергә инде алларына куелган ашларына үрелделәр .Инде өстәл артында тик тәлинкәгә чык та чык кашык тигән тавышлар гына ишетелә башлады .Аш артыннан , төелгән бәрәңге белән гуляш та сыпырып куйганнан соң ,инде малайлар табыннан китеп бардылар ,әниләре чәй эчәргә дисә дә ,әлегә эчмибез диеп урамга йөгерделәр . Менә хәзер сөйләшсәк тә була диде әниләре Булатка карап. Булат нәрсәдән башларга соң инде диеп торганда әниләре үзе сүз башлады .Менә әтисе Сочидан ялдан кайткач әйткән идем бит үзеңә ,кызыбызга бер егет гашыйк булды диеп. Менә инде шул егет Булат бу. Кызыбызны Татарстанга Казан шәһәренә эшкә чакыра һәм эшкә урнашырга да булышыр Алла боерса диде .Монда авыл җирендә нишли инде ул ,укып чыккач үз белемен эш белән күрсәтер вакыт җитте диде . Әтисе, син каршы түгелсеңдер инде .Юк - бар гына кешеләр түгел бу гаилә ,әти - әниләре белән дә аралаштык .Алар да медицинада ,әтисе Ашыгыч ярдәм машинасын йөртүче ,ә әнисе Буа шәһәренең үзәк хастаханәсендә баш табибә . Бер сүз дә дәшмиенчә тын гына тыңлап утырды әти кеше һәм җайлап кына Булаттан сорап куйды .Ә син үзең ни уйлыйсың соң бу турыда ? Хәлимә апаң сөйли дә сөйли, ә синең ләм - мим бер келимә сүз дәшкәнең юк . Булат ни әйтим инде мин дигәндәй Сәлимәгә карады , янәсе син ни диярсең .Мин яратам сезнең кызыгызны диде аннары ишетелер - ишетелмәс тавыш белән. Кая китте соң аның кыюлыгы , әле генә барысын да әйтәм дә салам диеп утыра иде бит ,ә хәзер авызында ботка кайнатып сүзен дәшәлми утыра .Сәлимә сүзгә кушылмаса белмим күпме утырыр иде әле шулай .Сәлимә әтисенә карап , әти ,без бер - беребезне яратабыз ,син рөхсәт итсәң мин Булат белән Казанга китәр идем диде .Әтисе бер кызына бер Булатка ,бер хатынына карап торды да ,кичтәнге акыл иртәнгә ярамаска да мөмкин , бүгенгә бу сөйләшүне куеп торыйк диде дә өстәл артыннан рәхмәтен әйтеп кубып та китте .Ул торып киткәч Булат та урыныннан кузгалды һәм ишек алдына чыгып китте .Урамда чыр - чу килеп башкортча сөйләшеп уйнаган малайларга карап тора башлады .Озак та тормый Сәлимә дә чыкты ,ул Булатка авылны күрсәтәм диеп урам буйлап алып китте .Алар чишмә буйларын карап кире кайтканда инде вакыт соң иде. Алар әкерен генә кереп ,чәй эчеп алганнан соң ,Булат үзенә җәеп куелган урынга барып ятты ,тик аның күзенә йокы кермәде ,иртәгә ни әйтер икән Сәлимәнең әтисе .Әнисе риза инде ризасын ,тик бит әле йортта әти кеше хуҗа ,ул ни дияр ...шундый буталчык уйлар белән ничек йоклап киткәндер иртән инде тәрәзәдән күзне чагылдырган кояшка уянды ул. Инде өйдә Сәлимә дә ,әтисе белән әнисе дә торганнар ,ә каршы якта стена буендагы агач караватта ике энесе генә йоклап ята иде . Булат торып ишек алдына чыкты ,иртәнге һава салкынча булса да рәхәт иде .Булат кеше юклыктан файдаланып тиз - тиз физзарядка ясап алганнан соң юынгычтагы салкын су белән битләрен юып алды да өйгә керде .Әле иртәнге чәй өстәле әзерләп кенә йөриләр иде аны өстәлгә дәштеләр һәм кичәнге сөйләшүне дәвам итеп Сәлимәнең Казанга китүенә риза икәнлекләрен әйттеләр . Булат аларга алайса без вакытны сузмыйбыз ,бүген үк юлга кузгалырбыз диде . Һәм алар юлга әзерләнә дә башладылар .Сәлимә барлык кирәк - яракларын җыйнады , укып чыккан дипломын һәм барлык документларын тагын бер кабат барлап чыкты .Юлга чыгарга бар әйберсе дә әзер булгач әтисе белән әнисенә рәхмәт әйтеп ,энеләре белән дә саубуллашып юлга кузгалдылар . Дәвамы бар . Гөлсинә Шакирова

Гульсиня Шакирова Сания . Хикәя .Дәвамы . Булат белән Сәлимә Өфенең тимер юл вокзалына килеп , Өфе - Казан поездына билет алып, юлга кузгалдылар . Булатның да Сәлимәнең дә куанычлары эчләренә сыймады ,тик шулай да Сәлимәнең эчендә ниндидер аңлашылмаган пошаман да бар иде .Ул үз - үзенә ,инде әллә ничә кабат биргән соравына кабат җавап эзләде. Дөрес эшләдеме соң ул , үзен әз генә белгән егеткә ияреп Казан дигән калага ияреп китеп .Егет кеше ни әйтмәс тә, кая чакырмас ?Их бу мәхаббәт дигән нәрсә ...утка да пешерә , суга да төшерә икән бит .Әле аның шушы яшенә җитеп, болай итеп бер егеткә дә гашыйк булганы булмады бит. Ә менә Булатны бер күрүдә ошатты һәм гашыйк булды . Ул буй сыны дисеңме ,йөз - кыяфәтеме , кап - кара куе чәчләре нәфис итеп кыска гына калдырып алдыруы белән үк егет солтаны инде . Булат та бит үзен бер күрүдә гашыйк булдым диде .Алар шул очырашудан соң Сочидагы ялларын да гел бергә уздырдылар ,ә инде кайтып киткәндә Булат аларны тукталыштан озатып калганда ярты йөрәген алып калгандай тоелган иде .Килеп алам мин сине дигән иде ул аңа ,менә бит сүзендә торган килеп тә алды ,алар кабат бергә .Тик алга таба ни булыр ,вакыт күрсәтер диеп үз - үзен юатты Сәлимә . Булатның да уйлары гел Сәлимә тирәсендә бөтерелде . Нишләрләр икән инде ? Сәлимә Казанга китәрме эшләргә ,әллә әнисе киңәш иткәндәй ,беренче эшли башлау чорын ,тәҗрибә сыман Буада гына урнашып эшләп торырмы ? Ул аңа бу турыда да сүз кузгатып карады инде ,тик бернинди дә җавап кына ала алмады .Я ярар диеп уйлады Булат үзенчә ,әти - әни янына кайтып карыйк әле ,алар белән уртага салып сөйләшербез Алла боерса ,әнисе әйтмешли кала дигәчтен дә анда да өеп куймаганнар ,барысын да үз көчең ,үз тырышлыгың белән табасы . Суткадан артык поездда кайтканда аларның икесенең дә уйларлык вакытлары җитәрлек иде .Ике гашыйкның ничек сөйләшеп сүзләре бетсен соң ,эшкә урнашу турында да сөйләштеләр алар, тик Сәлимә генә нәрсә диеп нәтиҗә ясарга да белмәде әлегә.Булат Буа шәһәренең дә бик матур икәнен ,хастаханәсе дә заманча җиһазлар белән булуын әйтеп үтте .Әнисенең дә укуын бетереп шушында кайтып эшли башлап баш табибә постына кадәр күтәрелүен бәйнә - бәйнә сөйләп бирде .Вакыт күп бер берләренә карап ,шулай сөйләшеп кайта торгач Казанга да кайтып җиттеләр ,ә аннан инде Буага автобуста кайттылар .Алар кайтканда әтисе дә әнисе дә эштә иделәр. Булат Сәлимәгә үз бүлмәсенә кереп өсләрен алмаштырырга кушты ,ә үзе зал ягында калды. Юлдан килгән киемнәрен алмаштырып ,кухняда Булат чәй куеп җибәрде .Суыткычтан әнисе пешереп калдырган ашны алып газга җылытырга куйды .Сәлимә дә булышырга дип кухняга кергәч ,бергәләп өстәл әзерләделәр .Алар юлдан кайткач ,ашны бик яратып ашадылар .Юлда ашаган коры - сарыдан соң бу аш чынлап та бик тәмле иде . Өстәлләрне җыештырып , савыт - сабаны юып куйдылар. Бергәләшеп эшләгәч рәхәт тә , тиз дә .Булатны әнисе өйдә ир эше, хатын кыз эше булырга тиеш түгел ,әнә әтиең белән без ничек ,син дә шундый булып үсәргә тиеш диеп өйрәтеп үстерде .Монда да ул Сәлимә янында бик теләп булышты ,әллә йортта ул хуҗа ,ә Сәлимә әлегә кунак кына буларак ул аңа булыштымы икән ,монысын инде Булат уйлап та тормады. Менә Сания белән Хәлим дә эштән кайттылар .Алар Сәлимә белән инде таныш булганлыктан җылы итеп исәнләштеләр .Булат яңадан кухняга барып чәй куеп җибәрде ,әнисе дә өстенә халат киеп кухняга чыкты . Сәлимә дә әнисе биреп җибәргән күчтәнәчләрне Сания апасына китереп бирде һәм әти - әнисенең сәләмнәрен җиткерде .Үзе оялып кына залдагы диванга барып утырды .Кунак булсаң тыйнак бул диде ул үз - үзенә .Бу сиңа авыл түгел ,үзеңне ничек күрсәтсәң шулай кабул итәрләр барган җиреңдә диеп өйрәтеп үстерде бит дәү әнисе дә . Хәлим абыйсы телевизорны кабызып куйды да кухняга кереп ,бар улым син Сәлимә янына чык ,күңелсезләнеп утырмасын диеп Булатны кухнядан чыгарып җибәрде . Сәлимә ни булса шул диеп , кухняга керде дә Сания апа кая мин сезгә үзем булышыем , Хәлим абый барыгыз сез Булат белән телевизор карый торыгыз дип нәрсә эшлисен сорады .Үзенең ничек дулкынланганын сиздермәс өчен, су сорап эчеп куйды . Алар Сания апасы белән бергәләшеп ашарга әзерләделәр, сүз иярә сүз чыгып эш турында да сүз кузгатып алдылар .Беренче килеп кергән көннән үк алар арасында җылы мөнәсәбәт урнашты .Әйтерсең лә алар бергә - бергә инде күп еллар аралашып яшәгәннәр диярсең. Дәвамы бар. Гөлсинә Шакирова.

Гульсиня Шакирова Сания . Хикәя. Дәвамы . Сания апасы янында Сәлимә үзен бер дә ят итеп тоймады ,ул аңа үз итеп ,якын итеп яратып дәште .Ашаганнан соң алар барысы бергә утырып алга таба нинди уй - планнары барлыгын сөйләштеләр . Яшьләргә нәрсә соң аларга , эрләнгән дә чукланган диде Хәлим көлеп ,ә Сания ипләп кенә Сәлимәнең эшкә урнашу , кая урнашса яхшырак булыр дигән уйлары белән кызыксынды .Дипломын сорап алып карады ,анысын сорамаса да билгеле бит инде , Кызыл Дипломда гел бишле билгеләре генә торасы ,тик шулай да ул дипломны бик җентекләп карап чыкты . Хирург димәк ,бик яхшы кызым диде ул ,бераз уйланып торганнан соң .Тырышлыгың күренеп тора .Практикаңны да яхшы хастаханәдә узгансың ,ә нишләп соң әле ,нинди сәбәпләр белән укуыңны бетереп ,диплом алгач мәҗбүри эшләргә тиешле хастаханәгә барырга теләмисең ? Берәр җитди сәбәбе бармы ? Аңлатып бирә алыр идеңме аның сәбәбен диеп турыдан бирде ул Сәлимәгә соравын .Сәлимә сөйләшүнең мондый борылыш аласын көтмәгән дә һәм уйлап та карамаган иде ,ул хастаханә Башкортстанның иң ерак районнарының берсендә иде . Бардылар анда Сәлимәләр әтисе белән .Карадылар ,район үзәгендә кечкенә генә бер агач баракта урнашкан ,килгән авыруларны дәвалау өчен бер уңайлыклары да ,кирәкле эш кораллары да булмаган бер хастаханә иде ул диде Сәлимә кабат шул хастаханәне күз алдына китереп .Әтинең дә мине бу юлсыз ,караңгы районда калдырасы килмәде. Үземнең дә шулай ук ,каласым килмәде диде ул Сания апасыннан уңайсызлана төшеп .Инде шушы минуттан Сания апасы да йомшак кына кагып , дилбегәне үз кулына алды .Әйт әле сеңелем диде ул аңа ,әгәр дә мин сиңа безнең хастаханәдә эшләп ,тәҗрибә тупларга тәкьдим ясасам син моңа ни диеп җавап бирер идең икән ? Мин баш табибә буларак сиңа тәкьдимне үзем ясыйм ,ә сайлау синең эшең . Сәлимәгә инде бу турыда Булат та әйтеп үткәргән иде ,шуңа күрә Сания апасының соравы аңа ят тоелмады ,ул ни актан ,ни карадан әлегә сүз дәшмәде .Тик шулай да инде үзен күптән монда торган кеше кебек хис итте .Кем инде ул монда ,ә ничек матур җылы кабул иттеләр ,эш тә тәкьдим итәләр ,кемгә тәтегән әле мондый бәхет дип уйлап куйды ул эченнән генә ,тик сүз кайтарып дәшмәде . Уйлап карармын Сания апа диде ул бераз пауза ясап алганнан соң ,ә иртәгә сезнең янга эшкә хастаханәгә барып карасам ни диярсезме икән , диде ул аннары Сания апасына карап .Ярар диде Сания , йокың туйгач Булат белән килерсез ,Булат алып килерсең яме улым диде аннан ,инде кайчаннан сүзгә кушылмыйча тыңлап кына утырган улына карап . Сүзне бүгенгә төгәлләнгәнгә санап үз бүлмәләренә кереп китте ,Булат Сәлимәне урамга йөреп керергә чакырды ,җәйге көн озын бит инде ул , әле кояш баерга да байтак вакыт бар иде ,алар шәһәр карарга чыгып киттеләр .Буа үзе зур шәһәрләрдән саналмаса да ,кечкенәләр рәтендә дә түгел иде .Үзенең үзәк хастаханәсе ,шәһәр уртасында урнашкан кино - театры ,күп кенә сәүдә үзәкләре булган шәһәр ,Сәлимәгә ошап та куйды сыман . Әле бит Булатның бер ел укыйсы бар . Син укырга киткәч мин монда бер ялгызым нишләрмен икән соң диде ул Булат белән урамда йөргәндә.Ничек инде бер ялгызың ,ә әниләр ,эшең ? Диде Булат , гаҗәпләнүен яшермичә .Казанда урнашсаң да ,без бит икебез ике җирдә булачакбыз ,син эштә ,ә мин укуда .Әле көн дә күрешергә дә җай чыкмаска мөмкин .Минем дә бит яхшы диплом белән чыгасым килә уку йортыннан . Алга таба да планнарым зурдан .Сине дә югалтасым килми .Шулай булгач безгә ныклап уйларга һәм тормышны алга таба алып бару өчен төпле планнар корырга һәм аларны тайчынмыйча үтәрбез бит сөеклем диде Булат , Сәлимәнең күзләренә туры карап .Я ,ни әйтә ала иде соң инде Сәлимә сөйгәненә каршы, ул да елмаеп кына карады да ,барысына да риза мин дигән сыман башын гына кагып алды һәм башын сөйгәненең иңбашына куйды . Дәвамы бар Гөлсинә Шакирова.

Гульсиня Шакирова Сания. Хикәя .Дәвамы Сәлимә белән Булат шәһәр урамы буйлап байтак йөрделәр әле . Алар кайтып кергәндә дә Сания ятмаган ,иртәгегә эшләнәсе эшләрен барлап , нидер язгалап утыра иде . Ул яшьләр кайткач аларга ягымлы гына итеп ,барыгыз анда чәй кайнап утыра ,тамак ялгап алырсыз да ,юлдан да кайттыгыз ,ял итәрсез диде. Сәлимә ,сиңа урын Булат бүлмәсендә җәйдем ,улым син үзең залда ятып йокларсың яме диеп ,хәерле төннәр ,татлы йокылар теләп үз бүлмәсенә кереп китте .Яшьләр дә чәйләп алганнан соң, Сәлимә үзенә җәйгән урынына Булатның йокы бүлмәсенә кереп китте. Ә Булат залдагы диванга урын салып шунда сузылды . Сәлимә яткач та, бик озак уйланып ятты әле Сания апасының тәкьдиме турында . Район үзәге булган Буа шәһәре дә матур гына икән үзе .Эш матурлыкта гына булса икән ул диеп фикер йөртте аннары . Аның барыннан да элек Булатны югалтасы килми иде шул .Булат та әнисе дә дөресен әйтәләр бит инде, кайда да эшләп табасы ,бер җирдә дә килдеңме мә әйдә диеп көтеп тә тормый,өеп тә куймыйлар. Ярый әле шушы ял йортына әтисе юллама бүләк иткән ,бу Сәлимәнең тормышын өч йөз алтмыш градуска борды да куйды .Шунда Булат белән очырашмаган булсалар ,ул хәзер кайда эш тапкан булыр идеме икән .Эше булыр иде анысы ,тик нинди урында һәм кемнәр арасында ,ә монда баш табибә булган Сания апасы үзе янына эш тәкьдим итте ,яшәп торырга тулай торакта үз бүлмәсе буласы .Булат белән кайтканда очырашырлар алла боерса .Гел аны гына саклап утыра алмый бит инде ул да . Шулай үз уйларына гел матур төсмерләр һәм юрамалар өсти өсти йоклап киткәнен тоймады да Сәлимә . Булатның да башында туксан төрле фикер бөтерелде .Ни диеп җавап бирер икән сөйгәне иртәгә .Риза булырмы ул шушында ,Буа шәһәре үзәк хастаханәсендә беренче эш адымнарын башлап җибәрергә үзе болай каршы да түгел кебек тә бит.Эх бу мәһәббәт дигәннәре ,бер утка сала ,бер суга батыра .Моңынчы бит Булатның мондый яратуны тик әтисе белән әнисендә генә татыганы бар иде .Ә менә Сәлимәне күрде дә капланды әбисе әйтмешли .Әбисе сүзләре искә төшкәч Булатның әбиләрен дә күрәсе килеп китте .Укырга киткәнче авылга да кайтып киләсе бары исенә төште .Аннары Сәлимәне дә әбиләре белән таныштырасы килә бит әле аның .Аларга ошармы ни диярләр икән дип үзалдына елмаеп та куйды ул хаттә .Ошатырлар ,оныклары яратканны ничек ошатмаска мөмкин инде җә .Шулай уйлар эчендә йоклап китте ул. Сания дә яшьләр кебек үк үз уйлары эчендә кайнады . Сочида очырашып ,танышу бер хәл ,монда бит бөтенләй дә башка мөһит .Ял иткәндә бит ул бар да әзер ,бар да матур һәм рәхәт .Әзергә бәзер бар да. Ә монда инде хәзер тормышны үзенә сөйрәсе .Болай ялкауга да ,тәкәббергә дә ошамаган үзе.Сөйләм теле дә ,фикер агышы да төшеп калганнардан түгел .Кулында Кызыл Диплом булуы үзен бер башка югары тотарга тырышуына бер сәбәп булып тора анысы ,ә бит әле ул бер тәҗрибәсез кая барып сыена ала .Үз канатым астына алып ,алга таба үстерергә кирәк бу яшь табибәне ,баланы диеп үз үзенә сүз бирде ул. Әллә йоклады Сания ,әллә юк ул уянганда тәрәзәдә инде кояш елмая иде ,ул сәгатькә күз төшерде ,сәгать әле алты да тулмаган .Аның инде аунап ятырга теләге юк иде ,торып юынып чәен куеп җибәрде . Суыткычтан иттарткычтан чыгарган итне алып котлетлар ясап пешерергә куйды һәм пьюре гына ясармын иртән торырларына диеп бәрәңге әрчеп кострюльдә суга бәрәңге куеп җибәрде .Ана кеше ана кеше шул инде ул .Иренә дә яраткан тормыш иптәше бит. Бүгенге иртәнең шундый матур җиңел башлануын Сания яхшыга юрады .Эченнән генә үзе белгән догаларны да укып алды .Аннары барысы да яхшы булыр Алла боерса Амин диеп аминын да итеп куйды . Менә шулай башланды бүгенге иртә Буа шәһәре үзәк хастаханәсенең баш табибәсе Санияләр фатирында . Дәвамы бар . Гөлсинә Шакирова .