М. Богдановань школась ЭРЗЯНЬ ЛИТЕРАТУРА ТУНДОДО ВАЛМОРОТ
Тундо
Ах тон, тундо, тундыне,
Тундо – мазый лугине.
Тенек самсто-ютамсто
Эсь лембесэть-валдосот
Кенярдовтыть ламо ошт.
Сэрей вирьга-укшторга,
Леенть кувалт – пандалга,
Ульцянть келес – вальмалга –
Пувси, нолси чевте кошт.
Эсь рунгонзо-мештензэ
Нарсо ацы масторось.
Умарькс прясо – пиресэ –
Ильцязь вешки письмарось.
Минь эйкакштнэ-пакшатне,
Мазый пингень цецинеть,
Паро мельсэ-вайгельсэ
Тундонь шкантень кецинек.
А. Юргай
Тундо
Менельсэ ёндолось верьгедсь,
Тусь виев пиземе жойсэ,
Телень ашо шубась перьгедсь,
Ушось эри тундонь койсэ.
Ловонть алдо лиси нарось –
Тундонь од пиже панарось.
Панжовсть весе эрьктне, лейтне,
Эзгаст капшазь уить эйтне.
Лисить озимтне сурсемекс,
Эйкакштнэнень тейсь нурсеметь.
Тундось манейгавты ушонть,
Од эрямо таго ушодсь.
П. Любаев
Тундонь зоря
Менель чиресь ламо толсо
Палы минек веленть песэ.
Тешттне ансяк тесэ-тосо
Цивтёрдыть олазь сырнесэ.
Удыть якстердиця пельтне.
Ялткеяк арась. Ванькс коштось.
Леесь ды лашмотне вельтнезь,
Мерят тусто сувсо почтонь.
Чуролгады, солы яла
Ушонть эйстэ вень чоподась.
Валскесь айги яла малав.
Чинть стямонзо учи яла.
И. Шумилкин
Присоединяйтесь к ОК, чтобы подписаться на группу и комментировать публикации.
Нет комментариев